Ngrohtorja e Gjakovës siguron mazut për një muaj

Gjakovë, 6 shkurt - Ngrohja do të kthehet në familjet dhe institucionet e Gjakovës që nga dita e hënë, pas një javë mungese, kanë thënë të dielën zyrtarë të Ngrohtores së qytetit. Kjo është bërë e mundur pasi kjo kompani është marrë vesh furnizuesin.
“Kaldajat do të nisin të ndizen që nga e diela në mbrëmje. Ndërsa jemi marrë vesh që të furnizohemi me mazut deri në fund të muajit shkurt”, tha drejtori i Ngrohtores, Astrit Dema.
Sipas tij, ngrohje do të kenë edhe ato ndërtesa kolektive që janë shkyçur prej
disa javësh shkaku i borxheve. Mirëpo, ai ka lutur amvisëritë dhe institucionet borxhlinj që edhe ato të ndihmojnë për mbajtjen në këmbë të kësaj kompanie, duke paguar faturat e
mbetura. “Ngrohtorja është pasuri e qytetarëve”, ka pohuar ai, duke kërkuar nga këta të fundit, që të kontribuojnë që kjo ndërmarrje të mund të vazhdojë të punojë pa probleme. Ngrohtorja po bën përpjekje që në një kohë sa më optimale të shlyejë borxhet ndaj furnizuesit. Në këtë drejtim drejtori tha se ka mbështetjen e Komunës.
Mungesa e ngrohjes ka shkaktuar telashe edhe në disa shkolla, kurse ajo “Fehmi”Agani” ka paralajmëruar se nga e hëna mund të ndërpresë mësimin për mungesë të ngrohjes.