Tekste të përbashkëta mësimore me Kosovën

Kryeministri i Shqipërisë, Sali Berisha ka vlerësuar se Shqipëria dhe Kosova duhet të shkojmë drejt teksteve të përbashkëta mësimore, me përmbajtje të njësuara, pasi të vërtetat – sipas tij – “janë një dhe detyra e shkencës është t’u heqë pluhurin dhe mykun e së kaluarës e t’i bëjë ato të shndrisin”.
Berisha është shprehur kështu të mërkurën, gjatë një takimi me një delegacion të Komisionit të Arsimit dhe të Shkencës të Kuvendit të Republikës së Kosovës, të kryesuar nga Arsim Rexhepi.

Duke theksuar se mes Shqipërisë dhe Kosovës, nuk duhet të ketë dallim për asnjeri se ku studion – Berisha ka thënë se - sistemi arsimor duhet të jetë i njëjtë, për të arritur synime të përbashkëta arsimore.

“Ne duhet të shkojmë drejt teksteve të përbashkëta, me përmbajtje të njësuara, pasi të vërtetat janë një dhe detyra e shkencës është t’u heqë pluhurin dhe mykun e së kaluarës e t’i bëjë ato të shndrisin. Ne do të bëjmë të mundur që çdo i ri apo e re që mbaron shkollën e mesme të ketë të hapura dyert për të shkuar në universitet, t’u hapim atyre rrugët e dijes dhe tregu vendos më pas për punësimin. Kemi bërë përparime të mëdha në këtë drejtim dhe ende kemi për të bërë, po trefishojmë numrin e studentëve krahasuar me katër vjet më parë dhe ende do ta rritim”, ka thënë Berisha.