Qeveria e shqetësuar nga arrestimet e EULEX-it

Qeveria e Kosovës ka shfaqur shqetësimin me arrestimet e së mërkurës të ish-pjesëtarëve të UÇK-së nga EULEX-i, me akuzën për krime të luftës.
Në një deklaratë për media, Qeveria ka vlerësuar se UÇK-ja dhe populli i Kosovës kanë zhvilluar luftë të drejtë, të pastër, ka respektuar normat dhe standardet ndërkombëtare.

“Qeveria e Republikës së Kosovës vlerëson se çdo përpjekje për njollosjen e luftëtarëve të UÇK-së do të dështojë edhe kësaj radhe. Qeveria e Republikës së Kosovës është e bindur se këto akuza do të vërtetohen si të pabazuara dhe të shpifura, për arsye se lufta çlirimtare e UÇK-së ka qenë në mbrojtje të vendit dhe popullit tone”, thuhet në deklaratë.

Po ashtu Qeveria është e inkurajuar me bashkëpunimin e të akuzuarve me autoritetet e drejtësisë, dhe është e bindur se kjo është mënyra e duhur për të dëshmuar pafajësinë dhe luftën e drejtë që është bërë për lirinë e Kosovës.

“Qeveria e Republikës së Kosovës mbështet sundimin e rendit dhe ligjit në mënyrë të pavarur dhe transparente. Qeveria e Republikës së Kosovës fton qytetarët e Kosovës, të cilët me plotë të drejtë janë të brengosur dhe të indinjuar me këto veprime, që të përmbahen dhe të kenë besim në pafajësinë e të akuzuarve dhe në sistemin e drejtësisë”, thuhet në fund të deklaratës së Qeverisë. /Telegrafi/