Të shqetësuar për lirinë e mediave

Asociacioni i Gazetarëve Profesionistë të Kosovës (AGPK) dhe Unioni i Gazetarëve të Kosovës kanë shprehur shqetësimin për vlerësimet e Raportit të Progresit të Komisionit Evropian që ka të bëjë me lirinë e medieve në Kosovë.
Në komunikatën e AGPK-së thuhet se vlerësimi i Komisionit Evropian për mosgarantimin në praktikë të lirisë së shprehjes përmbledh shqetësimet e AGPK-së të ngritura vazhdimisht për këtë çështje, ashtu si dhe për problemet që paraqiten në lidhje me qasjen në dokumentet zyrtare.

Duke sjellë ndërmend se liria e medias është një ndër elementët kyçë të demokracisë, AGPK iu bën thirrje institucioneve dhe akterëve të tjerë përgjegjës që të garantojnë lirinë e mediave, të jenë transparentë dhe të tregojnë partneritet, e jo përpjekje për kontroll mbi gazetarët dhe fjalën e lirë.

Edhe UGK përmes një komunikate për media ka shprehur shqetësim për gjendjen e lirisë së shprehjes në Kosovës, gjegjësisht pas publikimit të Raportit më të ri të Progresit të Komisionit Evropian që ka të bëjë me lirinë e mediave në Kosovë.

“Kjo gjendje e mediave është e pa tolerueshme dhe duhet të intensifikohen përpjekjet për ngritjen e lirisë së shprehjen dhe përmirësimin e lirisë së veprimit të gazetarëve, në mënyrë që Kosova të shënoj progres në raportet e ardhshme”, thuhet në njoftim.

Ndryshe, Komisioni Evropian të martën më 9 nëntor në Bruksel do ta miratojë Raportin e Progresit për Kosovën. Përveç tjerave, kritikat të mëdha në raport thuhet se janë në fushën e lirisë së medieve.