Kryesia e Kuvendit nuk diskutoi për rastin Pacolli

Prishtinë, 29 mars – (E plotësuar) Kuvendi i Kosovës nuk ka kërkuar dhe as nuk i ka sugjeruar Behgjet Pacollit që ta lëshojë Presidencën, as një ditë pas njoftimit të Gjykatës Kushtetuese se procedura e zgjedhjes së presidentit ishte në kundërshtim me normat Kushtetuese. Madje, as në mbledhjen e rregullt të Kryesisë së Kuvendit nuk është folur për çështjen e presidentit.
Burime të Koha.net pohojnë se Kuvendi posa ta marrë aktgjykimin, të mërkurën, do t’ia prezantojë atë Pacollit dhe vetëm atëherë do t’i kërkohet ta lëshojë Presidencën. Pavarësisht kësaj, të martën Pacolli nuk ka dalë në Presidencë dhe ka anuluar të gjitha takimet e planifikuara.

Kryesia e Kuvendit të Kosovës në takimin e jashtëzakonshëm të sotëm pas situatës së krijuar pas vendimit të Gjykatës Kushtetuese lidhur me mënyrën e zgjedhjes së presidentit Pacolli, i ka sugjeruar kryetarit Begjet Pacolli që të japë dorëheqje nga ky post.

Shef i Grupit Parlamentar të AAK-së, Ardian Gjini ka thënë se vendimi i Gjykatës Kushtetuese ka treguar se Kosova nuk ka pasur president dhe çdo vendim që është marr gjatë kohës sa Pacolli ishte president duhet të shfuqizohet, njofton Telegrafi.

Sipas tij, tash duhet të propozohet një kandidat i ri për president dhe çështja gjithsesi duhet të kthehet aty ku ka filluar. Megjithatë ai tha se edhe AAK-ja prapë do të bojkotojë sallën Kuvend kur të zgjidhet presidenti i ri. Gjini tha AAK-ja nuk ka ndryshuar qëndrim as në raport me ofertën që mund t’ia bëjë dikush për koalicion. Sipas tij, AAK-ja i ka parimet e veta, të cilat nuk do të ndryshojnë, pavarësisht ofertës që mund t’i bëhen.

Nënkryetari i Kuvendit, Xhavit Haliti ka thënë se vendimi i Gjykatës Kushtetuese duhet të respektuar nga secili person ndaj të cilit kjo gjykatë merr vendim. I pyetur nëse Behgjet Pacolli duhet të respektojë këtë vendim dhe të jep dorëheqje, Haliti ka thënë se para pak kohe Kosova kap pasur një praktikë të tillë, ku presidenti ka dhënë dorëheqje pas vendimit të Gjykatës Kushtetuese, dhe nëse Pacolli nuk e bënë një gjë të tillë, atëherë Kuvendi duhet të merr veprime konkrete.

Ndërkohë, pas mbledhjes së Kryesisë së Kuvendit, para mediave nuk deshi të prononcohet shefi i Grupit Parlamentar të AKR-së, Ibrahim Makolli.

Kryeparlamentari Jakup Krasniqi ndodhet për vizitë katërbitëshe në Hungari, e cila ka filluar sot.