EULEX-i dëshpëron edhe sindikatën e PK-së

Sindikata e Policisë së Kosovës ka reaguar të mërkurën pas arrestimit spektakolar nga ana e EULEX-it të drejtorit të Policisë për rajonin e Prizrenit, Nexhmi Krasniqi, duke e cilësuar mënyrën e arrestimit si njollosje të policisë vendase.

“Mos respektimi i rolit primar të forcës së sigurisë që ka Policia e Kosovës në zbatim të ligjit, si dhe metodat e tilla spektakolare njollosin imazhin dhe rolin e Policisë së Kosovës”, thuhet në një komunikatë për media lëshuar nga Sindikata e Policisë së Kosovës.

Sindikata përmes kësaj komunikate ka konsideruar se Krasniqi pasi ka punuar ngushtë me EULEX-in deri në momentet e fundit, nuk është dashtë të trajtohet në atë mënyrë.

Shoqata Sindikale për Regjionin e Prizrenit dhe Kryesia Qendrore e Sindikatës të Policisë së Kosovës konsideron se EULEX-i duhet të ketë besim dhe bashkëpunim të afërt me Policinë e Kosovës në operacionet e tyre duke respektuar rolin e Policisë së Kosovës në këtë fushë.

Reagim i Sindikatës së Policisë së Kosovës vjen pas reagimeve të shumta që kanë dalë nga shoqatat e dala nga lufta kundër arrestimeve të fundit nga EULEX-i nën dyshimin e krimeve të luftës, në mesin e tyre ishte edhe Nexhmi Krasniqi, drejtor i PK-së për regjionin e Prizrenit dhe ish-pjesëtar i UÇK-së.