Thaçi edhe me LDK-në, edhe me AAK-në

Sipas kabllos diplomatike të tetorit të vitit 2007, Partia Demokratike e Kosovës dhe Lidhja Demokratike e Kosovës e shihnin njëra-tjetrën si partnerin më të mirë për qeveri, edhe pse Hashim Thaçi thuhej se fshehurazi peshkonte edhe nga AAK-ja.

AAK-ja e kishte zor edhe pa Ramushin, edhe pa para, ndërsa vetë Kaidanow vlerësonte se ORA zor se e kalonte pragun, LDD-ja identifikohet me skandale korruptuese, ndërsa AKR-ja me dyshimet për lidhjet e Pacollit me rusët dhe Enver Sekiraçën.

Këto dhe detaje të tjera interesante për zhvillimet në skenën politike në vjeshtën e vitit 2007 jepen në kabllon diplomatike konfidenciale që shefja e atëhershme e Zyrës Amerikane në Prishtinë, Tina Kaidanow, e ka dërguar në Departamentin e Shtetit, të bërë publik nga Wikileaks, shkruan sot “Koha Ditore”.

Kablloja e gjatë jep vlerësimin për gjasat zgjedhore të gjashtë partive shqiptare të Kosovës – LDK, AAK, PDK, ORA, LDD dhe AKR – dhe analizon përgatitjet e tyre zgjedhore, synimet politike si dhe mundësitë për koalicionet e mundshme paszgjedhore.
/Telegrafi/