Mustafa: Presidenti të zgjidhet me konsensus

LDK-ja është e vendosur që presidenti të zgjidhet me konsensus politik. Kryetari i LDK-së, Isa Mustafa ka folur të dielën pas mbledhjes së Këshillit të Përgjithshëm, duke thënë se është e nevojshme që të ulen në tryezë me të gjitha partitë parlamentare për të gjetur një zgjidhje.

“Zgjedhja e presidentit do të duhej të ishte rezultat i një marrëveshjeje politike që do të shprehte interesat, jo vetëm të pozitës, por edhe të opozitës, përkatësisht të qytetarëve të Republikës së Kosovës”, ka thënë kryetari i LDK-së, raporton KTV.

Sipas Mustafës, për këtë ka pajtimin e gjithë Këshillit të Përgjithshëm të LDK-së.

I pyetur nëse mbështet LDK-ja kandidaturën e Behgjet Pacollit për president, Mustafa është përgjigjur se partia e tij nuk i është referuar asnjëherë kandidaturave të veçanta.

Nëse nuk ka një marrëveshje paraprake politike, LDK do të bëjë atë që ka bërë më 22 shkurt, bojkotimin e seancës së zgjedhjes së presidentit të Kosovës.

Mbledhja e Këshillit të Përgjithshëm të LDK-së, e thirrur pas zhvillimeve më të reja në Kosovë, përkatësisht për të marrë qëndrimin e strukturave të partisë se si të ecet më tutje konform zhvillimeve të fundit politike, është zhvilluar e mbyllur për media.