Presidenti i ri gjerman do të zgjidhet më 30 qershor

Presidenti i ri gjerman do të zgjidhet më 30 qershor. Presidenti i parlamentit federal gjerman Norbert Lammert, njoftoi se për këtë datë ka thirrur Asamblenë e 14-të Federale.
Asambleja federale ka si detyrë të vetme të zgjedhë presidentin federal. Ajo përbëhet nga të gjithë deputetët në parlamentin federal dhe një numër po aq i madh përfaqësuesish të landeve, të cilët përcaktohen nga parlamentet respektive.

Për pasuesin e presidentit Horst Köhler, i cili dha dorëheqjen të hënën, sipas vullnetit të kancelares Angela Merkel duhet të ketë një kandidat të përbashkët nga Unioni CDU-CSU dhe liberalët e FDP-së. Kandidati duhet të ketë edhe mbështetjen e opozitës, tha Merkel.

Kryetari i socialdemokratëve në opozitë Sigmar Gabriel i bëri thirrje Merkelit të diskutojë me të gjitha grupet parlamentare për një propozim të përbashkët. Presidenti i ardhshëm federal nuk duhet të ketë vetëm profil partiak, tha Gabriel.

Köhler e argumentoi dorëheqjen e tij me kritikat ndaj deklaratave të tij për misionet ushtarake të Bundesverit. /DW/