Modeli gjerman i paefektshëm

Modeli mbi bazën e të cilit kanë funksionuar dy Gjermanitë deri
në rënien e Murit të Berlinit nuk shihet nga kryetari i Kuvendit të
Kosovës, Jakup Krasniqi si opsion real për t’u aplikuar si formulë e
zgjidhjes së problemit që ekziston mes Kosovës e Serbisë. Derisa
ky model ka vite që është duke u shtyrë përpara nga diplomati gjerman
Wolfgang Ischinger, kreu i Kuvendit konsideron se i njëjti nuk do të
kishte asnjë lloj efekti në përmirësimin e marrëdhënieve mes Kosovës e
Serbisë, shkruan Koha Ditore.
“Ai model fundja ka të bëjë me popullin gjerman-gjerman, ndërsa
rrethanat, kushtet dhe krejt situata tjetër është në raport mes
Prishtinës dhe Beogradit”, ka deklaruar kryeparlamentari.
Por Ischinger vazhdon të besojë se “modeli gjerman”, do t’ua hapte
rrugën e integrimit në BE si Kosovës, ashtu edhe Serbisë, pa ngrehur pas
vetes domosdonë që këto dy vende ta njohin shtetësinë njëra-tjetrës.
“Modeli i dy Gjermanive mes Kosovës dhe Serbisë do të shërbente si
formulë që Beogradi të akomodohej përkohësisht ose të akomodonte
problemin që ka me mosnjohjen e Kosovës. Një aranzhim i përkohshëm nuk
është një ide e përjetshme, por është një ide që do të lejonte të dyja
shtetet që të kenë një aranzhim që do të mundësonte anëtarësimin e të
dyjave në OKB”, është shprehur Ischinger një ditë më parë. /Telegrafi/