LDK-ja pranon Pacollin?

Lidhja Demokratike e Kosovës (LDK) do ta pranonte Behgjet Pacollin për president vetëm nëse paraprakisht do të siguronte me marrëveshje se deri në verën e ardhshme (2012) vendi do të shkonte në zgjedhje të përgjithshme, përfshirë edhe ato për presidentin.

Kështu ka deklaruar kreu i LDK-së, Isa Mustafa, në një intervistë për emisioni Rubikon të Adriatik Kelmendit, e cila e plotë transmetohet të hënën prej orës 20:15, në KTV.

Me pretendimin se opozita në Kosovë ka më shumë vota se sa pozita, kreu i LDK-së, Mustafa, është i vendosur që të mos lejojë zgjedhjen e presidentit pa konsultimin paraprak mes partive parlamentare, ndonëse sërish vetë nuk do të caktojë një kundërkandidat.

Duke lënë fajtor kryeministrin Hashim Thaçi për situatën aktuale, Mustafa ka thënë se koalicioni qeverisës do të mund të llogarisë në pjesëmarrjen e deputetëve të tij në parlament gjatë votimit të presidentit vetëm nëse nënshkruan kontratë me Thaçin dhe partitë parlamentare që pas një viti vendi të shkojë në zgjedhje të reja.