Beqaj mohon mosmarrëveshjet me Pacollin

Ministri i Zhvillimit Ekonomik Besim Beqaj ka mohuar se ka pasur ndonjë mosmarrëveshje me zëvendëskryeministrin Behgjet Pacolli.

“Asnjëherë nuk kam pasur mosmarrëveshje me z. Pacolli. Janë koncepte që janë krijuar nëpër medie. Ne e kemi një koncept funksional të Qeverisë, e ajo është strategjia e zhvillimit ekonomik. Kushdo që diskuton për çfarëdo plane zhvillimore ato duhet të kalojnë nëpërmjet rregullit, harmonizimit të strategjisë që ne e kemi aprovuar si Qeveri, duke përfshirë këtu edhe partnerët e koalicionit”, ka thënë Beqaj në një intervistë për “Epokën e Re”.

Megjithatë, Beqaj ka deklaruar se në secilën qeveri dhe parlament ka zëra të ndryshëm e koncepte të ndryshme.

“Ne jemi përcaktuar për një ekonomi të tregut, ku privatizimi do të bëhet sipas standardeve më të larta ndërkombëtare, me ç’rast do të hiqen edhe mundësitë e drejtpërdrejta ndërkombëtare. Normalisht se këtu ka qenë një dallim i koncepteve, të cilat ne i kemi diskutuar me partnerët e koalicionit dhe sot kemi si rezultat edhe aprovimin e ligjeve”. /Telegrafi/