Krasniqi sugjeron Pacollin të mos rikandidohet

Pak çaste pas takimit midis Hashim Thaçit, Behgjet Pacollit dhe Isa Mustafës, kryeparlamentari Jakup Krasniqi ka deklaruar se i takon atij që në cilësinë e ushtruesit të detyrës së presidentit të Republikës të ketë konsultime me partitë politike, me qëllim të zgjidhjes së ngërçit politik, të krijuar pas vendimit të Gjykatës Kushtetuese rreth rastit të presidentit.
Në prani të përfaqësuesve të vendeve të Kuintit, të martën është zhvilluar një takim ndërmjet kryeministrit Hashim Thaçi, kandidatit të koalicionit qeverisës për president të Kosovës, Behgjet Pacolli, dhe kryetarit të LDK-së, Isa Mustafa.

Megjithkëtë, Krasniqi ka thënë se mbështet çdo marrëveshje që del nga ky takim që do të sillte një zgjidhje të pranueshme. Po ashtu ai ka thënë se situate e re e krijuar nënkupton se kandidatët e vjetër për president nuk duhet të kandidohen më për këtë post.

Ushtruesi i detyrës së presidentit të Republikës, Krasniqi tha që presidenti i ardhshëm duhet të dal si rezultat i konsultave me partitë politike dhe një konsensusi të përgjithshëm. Ai shpreson që kjo të arrihet të enjten në takimin që do të ketë me liderët e partive politike. /Telegrafi/