Arrihet marrëveshja, Pacolli nuk rikandidohet

Ish-presidenti i Kosovës, Behgjet Pacolli, ka deklaruar para pak minutash se është arritur marrëveshja për tejkalimin e ngërçit politik. Ai ka thënë se marrëveshja mes tij, kryeministrit Hashim Thaci dhe lideri të LDK-së, Isa Mustafa, ka shmangur mbajtjen e zgjedhjeve të jashtëzakonshme.

“Koalicioni qeverisës do të vazhdojë, ndërkaq me qëllim të tejkalimit të kësaj krize politike dhe institucionale, unë jam tërhequr nga rikandidimi im për postin e Presidentit të Republikës”, ka thënë Pacolli, i cili një muaj pas marrjes së postit të Presidentit u tërhoq nga kjo pozitë, pasi Gjykata Kushtetuese mori vendim se ai ishte zgjedhur president në mënyrë jokushtetuese.

“Nuk do të rikandidoj, sepse nuk dua të përjetoj atë që kam përjetuar. Isha viktimë e gabimeve të të tjerëve, andaj nuk dua të paguaj sërish për fajin e dikujt tjetër”, tha Pacolli në një intervistë për RTK-në.

Sipas marrëveshjes së arritur, Pacolli tha se presidenti i ardhshëm nuk do të ketë mandat të plotë, por gjashtë deri në nëntë muaj, kohë kjo e mjaftueshme për të bërë reformat zgjedhore dhe ndryshimet kushtetuese. Ai me këtë rast bëri me dije se pas ndryshimit të Ligjit zgjedhor do të kandidojë serish për postin e presidentit të Republikës, por kësaj radhe siç tha ai, duke kërkuar votën drejtpërdrejtë nga qytetarët e Kosovës.

Duke falënderuar faktorin ndërkombëtar për ndihmën e dhënë në arritjen e marrëveshjes, sidomos ambasadorin amerikan, Christopher Dell, Pacolli tha se më këtë marrëveshje edhe PDK-ja dhe LDK-ja janë pajtuar që të evitohen zgjedhjet e jashtëzakonshme