Marrëveshja për Kosovën, presidente Atifete Jahjaga

PDK, LDK dhe AKR, janë pajtuar të mërkurën që nënkolonelja Atifete Jahjaga, të jetë kandidatja e tyre për presidente të Republikës së Kosovës. Kjo është një nga pikat e marrëveshjes ndërmjet ish-presidentit Behgjet Pacolli, kryeministrit Hashim Thaçi dhe liderit të LDK-së, Isa Mustafa, e cila u arrit me ndihmën e ambasadorit amerikan, Christopher Dell. Në një konferencë të përbashkët për media, Thaçi, Pacolli, Mustafa dhe Dell, kanë falënderuar njëri-tjetrin për arritjen e kësaj marrëveshje.

“Që të tre liderët e tri partive tona, kemi arritur një marrëveshje për Kosovën e reformave, për Kosovën evropiane. Kemi dalë mbi interesat partiake për interesin e përgjithshëm”, tha kryeministri Thaçi, duke bërë të ditur edhe pikat e marrëveshjes. Ai tha se përveç kandidates së përbashkët, PDK, LDK dhe AKR janë pajtuar edhe rreth afateve kohore për ndryshimet në Ligjin zgjedhor, ndryshimet kushtetuese, mbajtjen e zgjedhjeve për president dhe atyre të përgjithshme.

Njeriu i cili në këtë konferencë ka marrë përgëzim nga Thaçi, Mustafa dhe Dell, për sjelljen e tij si burrështetas, ish-presidenti Behgjet Pacolli, tha se është tërhequr nga rikandidimi për president pa presin, me qëllim që të evitojë zgjedhjet e jashtëzakonshme. “Jam tërhequr sepse kam konsideruar se interesat e qytetarit të Kosovës duhet të jenë në rend të parë. Sa i përket koalicionit, them se tani është edhe më i fortë se sa atëherë kur u arrit kjo marrëveshje”, tha Pacolli.

“Unë isha president i Kosovës për 35 ditë, fillova në mënyrë të ndershme të punoj, e di këtë, u arritën suksese, bëra një plan veprimi për këtë vit, por erdhi vendimi i Gjykatës kushtetuese, e pranova atë, u desh të largohem nga pozita e presidentit dhe besoj se edhe këtu kam pas sukses. Ky sukses u pasua me një suksesin e sotëm, të cilin e arritëm me ndihmën e mikut të madh të Kosovës, Christopher Dell. Ishte sukses, sepse arritëm marrëveshje, arritëm t’i ulim në një tryezë të përbashkët dy liderët e partive më të mëdha”.

Lideri i LDK-së, Mustafa, tha se beson në marrëveshjen e arritur, e cila sipas tij është e rëndësishme për reformën e sistemit zgjedhor, për reformimin e Kushtetutës. Ai po ashtu tha se kandidatja për presidente do ta ketë mbështetjen e partisë së tij në punën e saj për të kryer reformat e nevojshme.

Nga ana e tij, ambasadori Dell, tha para gazetarëve, secili kosovarë duhet të jetë krenarë për këtë marrëveshje, për gatishmërinë e liderëve për kalimin e kësaj krize. “Fakti që jam këtu tregon saktë se udhëheqësit e Kosovës mund të punojnë bashkë për të mirën e Kosovës. Në demokraci gjithmonë ka vend për dallime, por duhet të ketë vend edhe për respekt, për respekt ndaj njerëzve që janë të gatshëm të sakrifikojnë interesat e veta për të mirën e qytetarëve të vendit të tyre, për respekt ndaj Behgjet Pacollit...”.

Lidhur me kandidaten për presidente, ambasadori Dell tha se është i bindur që Atifete Jahjaga do ta mbrojë Kushtetutën e Kosovës dhe do të jetë e përkushtuar për sundimin e ligjit. Ai tha se Jahjaga e ka mbështetjen e Shteteve të Bashkuara të Amerikës, dhe se beson që do ta ketë edhe mbështetjen e qytetarëve dhe institucioneve të republikës së Kosovës.

Marrëveshja PDK-LDK-AKR:

1. Nominojmë Atifete Jahjagën, si kandidate tonë për Presidente të Kosovës dhe shprehim përkrahjen e plotë të partive tona respektive për kandidaturën e saj. Jemi të përkushtuar ta vejmë interesin e vendit mbi atë tonin.

2. Ne pajtohemi që menjëherë të formojmë një komision për reformën e zgjedhjeve presidenciale që do të hartojë amendamentet e nevojshme kushtetuese dhe çfarëdo legjislacioni të ndërlidhur të nevojshëm për të amandamentuar Kushtetutën e Republikës së Kosovës, në mënyrë që presidenti të zgjidhet në mënyrë të drejtpërdrejtë nga populli.
Komisioni do të synojë të përfundojë punën e vet brenda 6 deri në 9 muaj nga data e themelimit të tij. Një anëtar i Kuvendit i identifikuar nga koalicioni qeverisës do të udhëheqë komisionin e themeluar për këtë qëllim.

Ne pajtohemi që zgjedhjet e para presidenciale në Republikën e Kosovës do të mbahen jo më vonë se 6 muaj nga data në të cilën ndryshimet e nevojshme kushtetuese dhe legjislative hyjnë në fuqi.

3. Ne pajtohemi që menjëherë të formojmë një komision për reformën e ligjit për zgjedhjet e përgjithshme, i cili mes dispozitave tjera do të përkrahë krijimin e më shumë distrikteve zgjedhore në Kosovë dhe do të hartojë ndryshimet e nevojshme legjislative dhe kushtetuese për të arritur këtë qëllim. Komisioni do të synojë të përfundojë punën brenda 8 deri në 12 muaj nga data e themelimit të tij. Një anëtar i kuvendit i identifikuar nga partitë opozitare do të udhëheqë komisionin e themeluar për këtë qëllim.

4. Ne pajtohemi se Ligji i reformuar për zgjedhje të përgjithshme do të përfshijë një dispozitë që thotë se zgjedhjet e para të përgjithshme, sipas ligjit të amandamentuar do të mbahen jo më vonë se 18 muaj nga data në të cilën ligji i reformuar për zgjedhjet e përgjithshme dhe amandamentet e ndërlidhura kushtetuese hyjnë në fuqi.

5. Ne po ashtu pajtohemi se si pjesë e kësaj marrëveshjeje do të paraqesim ndryshimet e përmendura në paragrafët 2, 3, 4 në mbledhjen e Kuvendit të Republikës së Kosovës, në të cilën zgjidhet presidenti i Kosovës.