Jahjaga do të shqyrtojë rikandidimin për presidente

“Është herët për një deklarim të tillë, sepse deklarimi për do
të nxiste akuza se unë paskam ambicie t’u imponohem partive politike.
Deklarimi jo do të thoshte se unë jam vetëm një administratore që dua ta
kaloj radhën dhe se nuk paskam ambicie të jem e përkushtuar dhe të jem
në shërbim të popullit dhe vendit tim. Për këtë do të vendos në kohën e
duhur dhe në momentin e përshtatshëm”, shprehet presidentja e vendit,
Atifete Jahjaga.Në një intervistë për gazetën Kosova Sot,
presidentja Jahjaga thotë se element kryesor për vendimin do të jenë
rezultatet e saj, stabiliteti dhe prosperiteti i vendit dhe sa do ta
përmbush njëmend misionin që të jetë faktor uniteti etj.
Në interesimin se a do t’i nënshtrohet marrëveshjes politike apo do
të insistojë në zbatimin e Kushtetutës sa i përket mandatit, presidentja
Jahjaga është shprehur “Unë jam zgjedhur në saje të marrëveshjes
politike dhe këtë detyrë e kryej në saje të përkrahjes së partive
politike që më kanë votuar, por edhe të partive politike parlamentare.
Është përgjegjësi e Kuvendit të Kosovës mandati i presidentit të vendit,
përkatësisht emërimi dhe shkarkimi i tij. Vetëm Kuvendi i Kosovës mund
të përcaktohet nëpërmjet procedurave të përcaktuara me Kushtetutë dhe me
ligj për faktin se sa do të zgjasë mandati i presidentes. A do të jetë
ai i plotë apo do të ndërpritet në momentin e caktuar. Nuk i përket
presidentit të deklarohet për këtë. Unë nuk mund të jem presidente pa
përkrahjen e Kuvendit, të subjekteve politike që më kanë votuar dhe që
më votojnë dhe gjithashtu nuk mund të ushtrojë asnjë ditë mandatin tim
jashtë normave dhe kompetencave kushtetuese”. /Telegrafi/