Nevojitet angazhim komunal për procesin e liberalizimit të vizave

Kryeministri i vendit Hashim Thaçi tha të enjten se kërkohet përkushtim për të vënë procesin e riintegrimin të personave të riatdhesuar në krye të listës së prioriteteve të secilës komunë, gjë që do të ndihmonte në fillimin e dialogut për procesin e liberalizimit të vizave.
Në takimin për procesin e liberalizimit të vizave, kryeministri tha se pas përfundimit të studimit të fizibilitetit për vitin 2009, Komisioni Evropian ka rekomanduar fillimin e dy proceseve shuam të rëndësishme për të ardhmen e raporteve me Bashkimin Evropian, fillimit të procesit për liberalizim të vizave, si dhe atë për marrëveshje për tregti të lirë në mes të Republikës së Kosovës dhe Bashkimit Evropian.

“Janë këto dy procese, në kuadër të të cilave Qeveria e Republikës së Kosovës, por edhe Bashkimi Evropian do të masë performancën e institucioneve në të dy nivelet”, tha ai.

Ai tha se në nivel qendror janë ndërmarrë një numër masash, duke filluar nga forcimi i kornizës ligjore, përmes Ligjit për Ripranim dhe marrëveshjeve bilaterale me vendet përkatëse. Pastaj, është përmirësuar korniza strategjike përmes miratimit të strategjisë dhe planit të veprimit për riintegrimin e personave të riatdhesuar etj.

Ai tha se për t’u siguruar që procesi nuk do të ngecë për shkak të mungesave financiare, kanë themeluar fond të posaçëm për nevojat e procesit të riintegrimit të personave të riatdhesuar, të cilët vetëm për këtë vit i kemi flokuar rreth 3.5 milionë euro.

Më tej, kryeministri u shpreh “Neve na është thënë qartë dhe shumë hapur dhe me të drejt, se pa demonstruar shkallë të lartë të angazhimit në nivel komunal të të gjitha komunave të Republikës së Kosovës, sidomos sa i përket procesit të riintegrimit të personave të riatdhesuar të Kosovës, nuk do të mund tu ofrohet udhërrëfyesi për liberalizimin e vizave”.

Megjithatë, Thaçi shprehu besim se kjo gjë do të tejkalohet dhe do të arrihen objektivat,

“Si rezultat, mesazhi që dëshiroj të përçoj sot, është se, kërkohet përkushtim serioz nga ana juaj për të vënë procesin e riintegrimin të personave të riatdhesuar në krye të listës së prioriteteve të secilës komunë që ju udhëhiqni, gjë që do të ndihmonte në fillimin e dialogut për procesin e liberalizimit të vizave”, u shpreh ai. /Telegrafi/