UPZ rrezikon të mbyllet

Universiteti Publik i Prizrenit pa i mbushur mirë një vit nga ekzistimi i tij rrezikon të mbyllet. Çelësi këtij universiteti mund t’i vihet për një vit nga Agjencia për Akreditim e Kosovës (AAK), duke mos e lejuar UPZ-në, sipas ligjit, të pranojë studentë të rinj vitin e ardhshëm si dhe duke ia ndaluar të dalin në vit të dytë studentët e pranuar në vitin akademik 2010-2011, si pasojë e mosaplikimit për riakreditim.
Udhëheqësit e kësaj agjencie kanë konfirmuar për “Zërin” se UPZ nuk ka aplikuar për riakreditim në afatin e paraparë, duke ia pamundësuar vetes të inkuadrohet në agjendën e procesit të akreditimit për këtë vit. Vonesa, sipas tyre, mund t’i kushtojë UPZ-së. Ndërsa, krerët e këtij universiteti kanë kritikuar për mosbashkëpunim zyrtarët e AAK-së, procedura jokorrekte të punës nga kjo agjenci, duke ua pamundësuar atyre t’i përgjigjen me kohë këtij procesi.

Të dyja palët kanë etiketuar njëra-tjetrën si jobashkëpunues, duke e nxjerrë veten të gatshëm për bashkëpunim dhe respektim kriteresh.

Drejtori ekzekutiv i AAK-së, Basri Muja, ka thënë se UPZ-ja është akredituar për një vit dhe ka qenë paraparë të aplikojë për riakreditim sipas ligjit para katër muajve. Mirëpo, sipas tij, udhëheqësit e kësaj agjencie nuk e kanë bërë këtë. “I kemi ftuar disa herë, kemi pasur takime edhe me rektorin. Jam shumë skeptik që UPZ-ja do të mund të procedohet këtë vit, për të filluar në tetorin e vitit të ardhshëm”, ka thënë Muja për “Zërin”.

Ai nuk ka mohuar se UPZ mund të ndërpresë veprimtarinë për një vit, pasi drejtuesit e saj nuk kanë riaplikuar.

Rektori i UPZ-së, Ronald Monch, ka theksuar se ka qenë AAK-ja, ajo që nuk ka qenë jo bashkëpunuese dhe nuk ka respektuar rregullat që duhet të ndiqen në këtë proces.

Monch i ka thënë gazetës se është angazhuar maksimalisht që ky Universitet t’i ngjasojë një institucioni të mirëfilltë shkencor. Në këtë rrugë, ai ka përmendur se fillimisht ka kërkuar që të shqyrtohen programet e studimeve, të cilat, sipas tij, janë në shpërpushje me tregun e punës dhe prodhojnë vetëm letra pa vlerë.

“Programet që jemi duke i zhvilluar si Juridik, Gjuhë gjermane dhe dy programe të Biznesit nuk janë për kërkesat që ka shteti”, ka thënë Monch, duke përmendur edhe një marrëveshje me AAK-në që të inkuadrohen programe të reja si arkitekturë, planifikim urban, inxhinieri industriale..., të cilat, ai thotë se i ka menduar me perspektivë dhe të ardhme të sigurt për të rinjtë që studiojnë në këtë universitet. /Telegrafi/