Vullkani në Ekuador, mbyllet aeroporti i Guajakuil

Autoritetet ekuadoriane janë detyruar të mbyllin aeroportin Guajakuil deri në pasditen e sotme, për shkak te hirit nga llava e vullkanit Tungurahua.
Lajmi është bërë i ditur nga autoritetet vendase të cilat saktësojnë se hiri i shkaktuar nga shpërthimi i vullkanit është në një lartësi prej 5023 metrash, lartësi kjo që rrezikon mjaft fluturimet e avionëve.

Ndërkohë, autoritetet nisën evakuimin e disa zonave në Ekuadorin Qendror, përkatësisht qytetin e Kusuas dhe ate të Juve Grandes.

Shpërthimet e vullkaneve në Amerikën e Mesme dhe Jugore kanë detyruar mijëra njerëz që të largohen nga shtëpitë e tyre. Në Guatemala pas shpërthimit të vullkanit Pacaya u mbyll aeroporti i kryeqytetit.

Një reporter televiziv i cili po informonte për shpërthimin u godit për vdekje nga thërmiat e llavës. Tre fëmijë konsiderohen ende të zhdukur. Në Ekuador disa qindra njerëz janë larguar nga fshatrat e tyre. Shtylla e tymit të vullkanit është rreth 10 mijë metra e lartë. /alsat/