AKR insiston për dy ministritë e reja

Aleanca për Kosovën e Re i kërkon dy ministri të reja dhe tre vende të zëvendëskryeministrave, thekson ushtruesi i detyrës së kryetarit të AKR-së, Ibrahim Makolli.
Makolli ka thënë për Epokën e Re se parimisht me partnerin e koalicionit PDK-në janë pajtuar që AKR-ja t’i ketë edhe dy poste ministrore dhe tre poste të zëvendëskryeministrave.

“Në parim jemi dakorduar që për shkak të gjendjes së krijuar pas largimit të z.Pacolli nga presidenti i vendit, të kemi një rishikim të marrëveshjes, ku AKR-së do t’i takonin edhe dy ministri dhe tre zëvendësministra. Është paraparë që në këtë javë që po lëmë pas të arrihet kjo marrëveshje. Por, sikurse jeni të informuar, një pjesë e kabinetit qeveritar gjendet jashtë vendit. Besoj se në ditët në vijim do të takohemi dhe përfundimisht do të përmbyllet kompletimi i qeverisë”, ka thënë Makolli.

Por ai thekson se ende nuk kanë diskutuar se cilat ministri do t’i takojnë AKR-së.

“Kemi theksuar se do të ishte mirë të na jepej hapësirë në ato ministri që kanë të bëjnë me zhvillimin ekonomik të vendit. Jemi të interesuar që kjo qeverisje të ketë sukses”, u shpreh Makolli. /Telegrafi/