Kabineti ‘gjigant’ qeveritar

Kryeministri i Kosovës, Hashim Thaçi, ka zgjedhur që pakënaqësisë së ish-presidentit të vendit, Behgjet Pacolli, për largimin e tij nga presidenca t’i përgjigjet me “shpikjen” e dikastereve të reja qeveritare dhe dhënien e tyre në dispozicion të partisë së Pacollit.
I ndodhur përballë sfidës për të larguar dy anëtarë të partisë së tij nga postet ministrore dhe “faljen” e këtyre pozitave drejtuesve të Aleancës Kosova e Re (AKR), Thaçi ka zgjedhur një rrugë më të lehtë.

E përditshmja Zëri shkruan të dielën se krijimi i Ministrisë së Diasporës dhe largimi i një ministri të PDK-së nga qeveria, është “haraçi” që i pari i qeverisë do të paguaj për ta mbajtur kabinetin e tij në këmbë.

Me Ministrinë e Diasporës, qeveria do të ketë 19 ministra, numri i zëvendës/ministrave do të shkojë mbi 30 dhe gjashtë zëvendëskryeministra. Nga kjo del se kabineti qeverisës do të ketë rreth 60 anëtarë, të cilët Kosovën e bëjnë me qeverinë më të “rëndë” në rajon. /Telegrafi/