Jahjaga në pritjen solemne për Festën e Pashkëve

Prishtinë, 24 prill - Presidentja e Kosovës, Atifete Jahjaga u prit të dielën nga Ipeshkvi i Ipeshkvisë së Kosovës, Imzot Dodë Gjergji. Në fjalën e tij në ceremoninë solemne Imzot Dodë Gjergji tha se kjo është hera e parë që një Presidente femër uron Pashkët në një katedrale katolike.
Presidentja Jahjaga uroi Imzot Dodë Gjergjin dhe të gjithë besimtarët e krishterë për festën e Pashkëve. Në fjalën e saj para të pranishmëve Jahjaga tha se populli e di dhe e respekton angazhimin e Kishës katolike për Fe e Atdhe, që ka qenë parimi themelor i angazhimit nëpër shekuj dhe ky angazhim dhe ky unitet me popullin do të ekzistojë sa të jetë jeta.
“Unë si Presidente e Republikës së Kosovës ju deklaroj se shteti i Kosovës, institucionet e tij, janë të gatshme të ofrojnë të gjithë ndihmën e nevojshme, pra shteti do t’i kryejë të gjitha obligimet kushtetuese dhe ligjore ndaj komuniteteve fetare, dhe në këtë punë jemi të gjithë së bashku, për të përparuar proceset demokratike dhe për të ndërtuar shoqërinë në vlerat e saj njerëzore, që respektojnë liritë dhe të drejtat e njeriut, që respektojnë dinjitetin e individit dhe të institucioneve. Erdha këtu në katedralen ‘Nëna Terezë’ që të gjithë besimtarëve të krishterë t’ju uroj Pashkët, këtë festë më të madhe të krishterimit. Këtë festë të Ringjalljes dhe të besimit në jetën e amshueshme, në vlerat e të gjithë njerëzve si krijesa të Perëndisë. Urojë të gjithë qytetarët e Kosovës që Pashkët t’i kalojnë me familjarët, me miqtë, shokët në gëzime, në hare dhe në begati.
Uroj që në këtë ditë të kujtojmë dhe të ndihmojmë ata që kanë nevojë për përkujdesjen dhe për ndihmën tonë”, tha pos tjerash presidentja e vendit në këtë pritje, thuhet në njoftimin e Zyrës së Presidencës.