Përfaqësim i përbashkët Kosovë-Shqipëri?

Komisioni Parlamentar për Punë të Jashtme miratoi propozimin për
Ministrinë e Punëve të Jashtme lidhur me përfaqësimin reciprok ose të
përbashkët mes Kosovës e Shqipërisë.Kryetari i komisionit,
Albin Kurti, ka theksuar nevojën e inicimit të një marrëveshjeje të
tillë për përfaqësim reciprok ose të përbashkët në vendet e treta.
“Propozimi mbështetet në nevojën që në vendet, të cilat nuk e kanë
njohur pavarësinë e Kosovës dhe në vendet, në të cilat përkundër
njohjes, ende nuk është shtrirë përfaqësimi diplomatik i Kosovës të ketë
përfaqësim të vendit tonë. Është pohuar gjithashtu që përfaqësimi
reciprok ose i përbashkët në mes të Kosovës dhe Shqipërisë ka për qëllim
përmbushjen e nevojave dhe realizimin e interesave të shumta të
qytetarëve tanë jashtë vendit, zvogëlimin e shpenzimeve buxhetore të
Kosovës, si dhe rritjen e bashkëpunimit ekonomik e të këmbimeve
kulturore”, thuhet në njoftimin e Komisionit.
Propozimi do t’i dorëzohet Ministrisë së Punëve të Jashtme të Kosovës që ta fusë në Programin e saj të punës.
Anëtarët e komisionit e kanë mbështetur idenë që propozimi për
përfaqësim reciprok ose të përbashkët, tu dorëzohet komisionit homolog
në Shqipëri dhe Ministrisë së Punëve të Jashtme të Shqipërisë, si dhe
Ambasadës tonë në Tiranë.
Është mbështetur qëndrimi që konform Rregullores së Kuvendit,
komisioni, por edhe deputetët e Kuvendit, nëpërmjet raporteve të
shkuara, të njihen me rezultatet e vizitave jashtë vendit të
përfaqësuesve parlamentarë të Kosovës.
Po ashtu është kërkuar gjithashtu që komisioni, në çdo gjashtë muaj,
të njihet për rezultatet e diplomacisë parlamentare të legjislativit të
vendit.
Në takimin e sotëm të Komisionit ishte paraparë edhe raportimi i
ministrin Enver Hoxhaj, rreth njohjeve të reja, por kjo pikë është
shtyrë për ndonjë mbledhje të komisionit, për shkak të agjendës së
ngjeshur të ministrit. /Telegrafi/