Në Mitrovicë turqit ndërtojnë xhaminë më të madhe në Kosovë

Në vendin ku tani ndodhet Xhamia “Isa Beg” në qendër të
Mitrovicës, apo siç njihet nga qytetarët, Xhamia e Zallit, e cila do të
rrënohet, pasi që është dëmtuar gjatë luftës nga forcat serbe, do të
ndërtohet xhamia e re, më e madhja dhe më moderne në Kosovë.Xhamia
do të ketë rreth 2.500 metra katrorë hapësirë të shfrytëzueshme, duke
përfshi këtu edhe të për mësim-besim. Do të ketë edhe dy minare me
lartësi prej 48 metra. Punët në realizimin e këtij projekti pritet të
fillojnë së shpejti, ndërsa përfundimi i xhamisë në tërësi shpresohet të
bëhet brenda afatit dyvjeçar.
Paralajmërimet për ndërtimin e kësaj xhamie e bëri të të martën
myftiu i Komunës Bajram Pasha të Stambollit të Turqisë, Izet Shener, i
cili me bashkëpunëtorë po qëndron në Mitrovicë si mysafir i Bashkësisë
Islame të Komunës. Mysafirët nga Turqia i ka pritur kryetari i Komunës,
Avni Kastrati.
Myftiu Shener tha se ndjehet mirë që gjendet në Mitrovicë, komunë kjo
me të cilën, në aspektin fetar, komuna e Bajram Pashës në Stamboll
mbanë kontakte vëllazërore. Ai ka thënë se ka ardhur në Mitrovicë me
bashkëpunëtorët e tij për ta prezantuar projektin për ndërtimin e një
xhamie të re në qendër të qytetit, që do të jetë xhamia më e madhe që
ndonjëherë ka pas Kosova.
“Kemi sjell me vete edhe projektin e xhamisë të bërë gati nga
ekspertët tanë, me qëllim që edhe ju të jepni pëlqimin tuaj dhe të
përgatisni në afatin sa më të shkurtër të mundshëm kohor lejet përkatëse
dhe të na ndihmoni për disa çështje përgatitore për fillimin e
menjëhershëm të punëve në realizimin e projektit”, ka thënë Shener.
Kryetari Kastrati, pasi e falënderoi Shenerin për ndihmat e
vazhdueshme që Myftinia e Komunës Bajram Pasha ka ofruar për qytetarët e
Mitrovicës, tha se pushteti lokal i kësaj komune është vëllazëruar me
dy komuna të tjera të Turqisë dhe ka një bashkëpunim shumë të mirë edhe
me komuna të tjera, të cilat po ashtu kanë ofruar ndihmë në forma të
ndryshme. /Telegrafi/