Agani shpreh mbështetjen për personat me aftësi të kufizuara

Ministri i Shëndetësisë i Republikës së Kosovës, Ferid Agani, priti sot në një takim Kalle Konkolla, ish-deputet i Parlamentit Finlandez dhe ish kryetar i Organizatës Botërore të Aftësisë së Kufizuar (DPI), që tash udhëheq organizatën “Treshold” në vendin e tij.
Në këtë takim, Ministri Agani e ka njohur z. Konkolla, që shoqërohej nga drejtori i HANDIKOS-it në Kosovë, Afrim Maliqi, me procesin e reformave në shëndetësinë kosovare, sfidat e këtij sektori dhe angazhimet e bëra për të ndihmuar edhe personat me aftësi të kufizuara, për të cilët u tha se duhet bërë më tepër.
Në këtë takim i është shprehur falënderim Qeverisë së Finlandës për ndihmën e saj dhënë qendrave të rehabilitimit të bazuara në bashkësi dhe zyrave lokale përfshirë edhe veriun e Mitrovicës, aktivitete këto të drejtuara prej HANDIKOS-it.
Në këtë takim, Ministri Agani dhe z. Konkolla kanë biseduar për mundësinë e projekteve të ndryshme të përbashkëta nga të cilat do të përfitonin komuniteti i personave me aftësi të kufizuara, ndërkohë që donatorëve u është bërë thirrje që të vazhdojnë kontributin e tyre në mbështetje të mëtejme kësaj kategoria vulnerabile, bashkë me institucionet vendore.