Rikthimi i ‘Commodore 64’, në qershor

Kompania amerikane “Commodore USA” planifikon që, në qershor, ta lëshojë në shitje modelin e ri të kompjuterit, i cili dikur mbante epitetin e kompjuterit më të famshëm në botë, “Commodore 64”. Kompjuteri i kultit, i cili ka hyrë edhe në librin e rekordeve “Guinness”, do ta mbajë pamjen e vjetër, por performansat do t’i ketë moderne.
“Commodore” i ri do të ketë një procesor ‘dual core’ ‘Atom’ me 1.8 GHz, një kartelë grafike ‘Nvidia Ion2’, 4GB RAM memorie, lexuesin multi-format të kartelave të memories, kyçjen USB dhe lidhjen e internetit ‘Wi-Fi’...
Çmimi fillestar do të jetë 595 dollarë, sa kishte kushtuar edhe modeli i parë, gjatë viteve 1980.
Kompjuteri i parë “Commodore 64” kishte arritur një popullaritet të madh gjatë viteve 1980, për shkak se ishte më i lirë se konkurrentët (“IBM” dhe “Apple”), pastaj kishte një memorie më të madhe dhe kishte mundësi që të lidhej thuajse me të gjitha llojet e televizorëve, të cilët në këtë rast shërbenin si monitorë.