Serwer: Ndarja e Kosovës një ide e keqe

Ish-diplomati amerikan dhe eksperti i Qendrës për Marrëdhënie Euro-atlantike të Universitetit John Hopkins të Washingtonit, Daniel Serwer, ka vlerësuar se ideja për ndarjen e Kosovës është një ide e keqe, e cila kurrë nuk do të realizohet.
Në intervistën dhënë radio Evropës së Lirë në gjuhën serbe, të cilën e transmetoi KiM radio, Serwer tha se nuk është kundër asaj që të bisedohet mbi idenë e ndarjes, por konsideron se kjo temë për shkak të faktit se është e dështuar do të vdiste posa të hapej.

“Unë nuk kam kundër që ajo të diskutohet, por jam i sigurt se ndarja do të ishte një ide e tmerrshme”, konsideron Serwer. Ai i ka paraqitur arsyet pse është kundër.

“E para, se nuk do të kishte ndarje të Kosovës pa ndarje që do ta prekte edhe Serbinë, meqë aq sa do të fitonte Serbia në veri të Kosovës, do të merrnin shqiptarët në Luginën e Preshevës. E dyta, sikur kjo të pranohej që do të ishte gjë shumë e çuditshme, do të duhej të garantonte se një skenar i tillë nuk do të kishte efektin domino në Bosnjë e Maqedoni”.

Serwer ka vlerësuar se vizita e shefit të ekipit negociator të Beogradit, Borko Stefanovic në Prishtinë ishte rast i mirë për zyrtarët serbë të shohin si funksionon Qeveria e Kosovës.

“Unë jam anues dhe animi im konsiston në atë që të ketë sa më shumë dialog, sa më shumë shkëmbim qëndrimesh”, ka sqaruar Serwer, i cili me këtë vështrim e sheh vendim të mirë vizitën e përfaqësuesit të Serbisë në Kosovë dhe takimin me bashkëbisedues shqiptarë.

“Pra, e mbështes një hap të tillë. Unë madje jam angazhuar dhe ka kohë që Tadic të shkojë në Kosovë. Mendoj se kjo me të vërtetë do të ishte një ide e mirë”, është shprehur ai.

Serwer konsideron se ka rëndësi që Serbia ta kuptojë se Kosova ka qeveri, e cila funksionon dhe se ky fakt, siç është shprehur ai, nuk është zhdukur dhe nuk do të zhduket. /Telegrafi/