Pritet të nis gjykimi i tre serbëve nga Novobërda

Slobodan (54) dhe Srecko Martinovic (58) nga Plavica, dhe Svetllana Stojanovic (43) nga Bostani i Novobërdës, pritet të dalin para gjyqit në Prishtinë, më 7 qershor 2011.
Prokuroria e Qarkut të Prishtinës i ngarkon ata se në prill të vitit 1999, kishin privuar nga liria dhe i kishin rrahur Selatin Beqirin dhe Haqif Demollin nga Bërda, duke iu “shkaktuar vuajtje e lëndime”.

Mbrojtësi i tyre, Miodrag Brklac, i ka thënë agjencisë serbe të lajmeve Beta se klientët e tij e mohojnë fajin.

“Është e sigurt se në seancën e parë gjyqësore të akuzuarit do të deklarohen të pafajshëm, dhe pastaj gjykimi do të shkoj në fazën tjetër, lexim të aktakuzës dhe të fakteve të prokurorisë, më pastaj edhe të dëshmitarëve të mbrojtjes”, ka sqaruar Brklac, duke shtuar se procesin në Gjykatën e Qarkut të Prishtinës e udhëheq Ferdinando Gutjer, gjyqtar i EULEX-it, vazhdimi i të cilit është caktuar për datat 14,16 e 17 qershor.

Këta janë arrestuar në shtëpitë e tyre në komunën e Novobërdës më 24 shtator të vitit 2009, me dyshimin për krime lufte, për ç’arsye u ishte caktuar paraburgimi.

Ata edhe pse ishin liruar në dhjetor të 2009, prokuroria kishte ngritur aktpadi e cila është konfirmuar në mars të këtij viti. /Koha//Telegrafi/