Në tetor nis gjykimi i Fatmir Limajt

Fatmir Limaj nga fundi i muajit tetor do të shkojë në gjykatore për t’iu nënshtruar procesit gjyqësor.

Ai do të përgjigjet për akuza të rënda të ngritura nga një prokuror italian për krime lufte kundër popullatës civile dhe krime lufte kundër të burgosurve të luftës. Këto krime supozohet se janë kryer në fshatin Kleçkë nga fillimi i vitit 1999 deri në përfundim të luftës së Kosovës, njofton Koha Ditore.

Burime të afërta me procesin kanë thënë se si datë e mundshme për nisjen e gjykimit është folur 17 tetori. Mirëpo, sipas EULEX-it, data e saktë nuk është caktuar ende, derisa një gjyqtar i EULEX-it është ngarkuar si kryetar i trupit gjykues për ta përgatitur procesin dhe nisjen e gjykimit. Fundin e muajit tetor e ka përmendur edhe zëdhënësi i EULEX-it, Blerim Krasniqi.

“Ende nuk është caktuar data e fillimit të gjykimit për ‘Rastin Kleçka’, por pritet të fillojë në fund të muajit tetor”, ka thënë shkurt Krasniqi. /Telegrafi/