Italia nuk e pengon heqjen e vizave për Kosovën

Italia do të vazhdojë ta mbështesë Kosovën gjatë proceseve integruese. Kështu i ka premtuar kryetarit të Parlamentit të Kosovës, Jakup Krasniqi, kryetari i dhomës së deputetëve të Parlamentit Italian, Xhanfranko Fini, që ka pritur një delegacion të parlamentit të Kosovës. Çështja e liberalizimit ishte një ndër temat që është diskutuar.

“Italia nuk është pengesë për këto procese të liberalizimit të vizave, siç janë edhe disa vende të tjera…”, tha Krasniqi. Kryeparlamentari tha se gjatë takimit të delegacionit kosovar me kryetarin e Dhomës së deputetëve të Italisë, janë dakorduar për ngritje të bashkëpunimit bilateral, në mbështetje të Kosovës edhe në procesin e njohjes, nga 5 vendet e Bashkimit Evropian. Delegacioni kosovar gjatë ditës është takuar me ambasadorin e Kosovës në Itali, Albert Prenkaj.