Thaçi: E ardhmja, veç në BE

Kryeministri i Kosovës Hashim Thaçi ka shprehur bindjen e thellë se e ardhmja e Kosovës është në Bashkimin Evropian, por kjo, sipas tij, nuk varet vetëm nga një individ apo nga një ministri përkatëse, por varet vetëm nga një koordinim i plotë i të gjitha institucioneve shtetërore dhe një pune ekipore në plotësimin e agjendës evropiane.

Këto komente, kreu i ekzekutivit të vendi i bëri në takimin e gjashtë të Këshillit Ministror për Integrim Evropian, në të cilin ka kërkuar nga ministrat e Qeverisë së Kosovës që të angazhohen më shumë për plotësimin e agjendës evropiane.

Për një monitorim të punës së tyre, ai ka thënë se do të jetë Ministria e Integrimit Evropian, e drejtuar nga Vlora Çitaku, ajo që do të kujdeset. “Në asnjë mënyrë nuk do të lejojmë që agjenda evropiane e Kosovës të pësojë për shkak të mospunës së ndonjë individi, një departamenti apo një institucioni. Gjatë muajve të mbetur Ministria e Integrimit Evropian do të ketë mandat dhe përkrahje të plotë në monitorimin dhe raportimin e zbatimit e obligimeve të secilit institucion”, ka thënë Thaçi.

Për integrimin në Bashkimin Evropian, Thaçi ka thënë se nuk është i nevojshëm vetëm plotësimi i legjislacioni, por edhe reformat e thella në të gjitha fushat dhe në këtë drejtim, ai ka thënë Kosova është duke bërë reforma të thella, duke instaluar një qeverisje të mirë dhe reformatore, me mentalitet evropian, njofton Zëri.

“E ardhmja evropiane është vullneti i qytetarëve të Kosovës, është vizioni ynë dhe ne jemi të bindur dhe të sigurt në të ardhmen shumë të qartë evropiane të Republikës së Kosovës. Presim në të ardhmen fillimin e dialogut për liberalizimin e vizave, marrëdhënieve tregtare dhe marrëdhënieve kontraktuale”, ka thënë ai.

Kreu i ekzekutivit të vendit ka thënë se Qeveria në bashkëpunim të ngushtë me Komisionin Evropian i ka ndërmarrë hapat e nevojshëm për plotësimin e kritereve të domosdoshme për marrjen e strategjisë për liberalizimin e vizave, ndërkaq nën koordinimin e Ministrisë së Integrimit Evropian dhe Ministrisë së Punëve të Brendshme, korniza legjislative është kompletuar, janë vendosur politikat implementuese dhe janë ndarë mjetet e nevojshme financiare. /Telegrafi/