Para Kosovës është e ardhmja evropiane

Të gjitha vendet e Ballkanit perëndimor duhet të bëhen anëtarë
të Bashkimit Evropian- ka thënë të shtunën shefi i diplomacisë çeke,
Karel Schwarzenberg.Sipas vlerësimit të Schwarzenberg,
perspektiva e të qenit anëtar i ardhshëm është edhe para Kosovës duke
shprehur bindjen se nuk do të zgjasë gjithmonë situata që disa vende
anëtare të BE-së ta kenë njohur pavarësinë e Kosovës, e disa të tjera
jo.
“Me kalimin e kohës kjo do të rregullohet. Nuk mendoj se do të zgjasë
shumë”, ka thënë ministri i Jashtëm çek në një intervistë për agjencinë
sllovake TASR.
Për më shumë, ai e ka bërë të qartë se Kroacia do të jetë vendi i
parë nga rajoni që do të inkuadrohet në BE, ndërsa ka thënë se e
përgatitur është edhe Serbia.
Maqedonia, sipas tij, duhet ta rregullojë çështjen e emrit me
Greqinë, derisa Shqipëria dhe Bosnje e Hercegovina duhet t’i zgjidhin
çështjet e brendshme./Telegrafi/