E ardhmja e Kosovës dhe e Serbisë në Evropë

Bashkimi Evropian është ai që duhet të vendosë nëse njohja e
pavarësisë së Kosovës është kusht për Serbinë që të bëhet anëtare e
familjes së vendeve evropiane, ka deklaruar sekretari i parë i Ambasadës
amerikane në Prishtinë, Alfred Boll. Ai theksoi se Amerika e
sheh të ardhmen e Kosovës, por edhe të Serbisë në institucionet
evropiane dhe se “kjo e ardhme është e rëndësishme për Kosovën, Serbinë
dhe për ne”.
Lidhur me mesazhet që vijnë nga Serbia për ndarjen eventuale të
Kosovës, diplomati amerikan tha se qëndrimi i Amerikës është që ndarja e
Kosovës është plotësisht e papranueshme, sepse konsideron se kjo “do të
ishte e tmerrshme për tërë rajonin dhe kjo është ide, e cila është jo
vetëm kundër Kosovës por edhe kundër Evropës”, citon QIK-u pohimin e
Bollit në një intervistë për “Zërin e Amerikës” në gjuhën serbe.
Duke folur për periudhën e pasluftës, diplomati amerikan tha se ka dy
vjet që ndodhet në Kosovë dhe vlerësoi se ka shumë progres sa i përket
serbëve. Duke marrë si shembull decentralizimin, ai tha se ekzistojnë
pesë komuna të reja, shumë më tepër njerëz që kanë marrë pjesë në
zgjedhje si dhe ka politikanë që janë të gatshëm të punojnë për
popullin.
Sa i përket veriut të Kosovës, diplomati Boll tha se pala amerikane
përpiqet që të ofrojë mbështetjen dhe të tregojë se me të vërtetë
dëshiron të dëgjojë cilët janë problemet e njerëzve atje dhe të punojnë
për ta.
Ai tha se i vjen keq kur dëgjon për mesazhe e tipit “ne nuk e duam e USAID-in”.
“USAID duhet dhe dëshiron të punojë. Amerika për 10 dhjetë ka
investuar në Kosovë mbi 600 milionë dollarë dhe gjithashtu dëshiron që
edhe në veri të Kosovës të punojë shumë më tepër”, tha Alfred Boll.
/Telegrafi/