Perspektiva e Kosovës është ajo evropiane

Kryeministri i Kosovës, Hashim Thaçi, është takuar në Lubjanë kryeministrin e Sllovenisë, Borut Pahor, në një takim ku është diskutuar për forcimin dhe bashkëpunimin e dy vendeve mike, për mbështetjen sllovene për perspektivën evropiane të Kosovës dhe për temat tjera me interes.

Në një njoftim të Zyrës së kryeministrit thuhet se Thaçi i ka shprehur mirënjohjen kryeministrit Pahor për mbështetjen që Sllovenia i ka dhënë avancimit të proceseve demokratike dhe zhvillimit në Kosovë dhe shtoi se bashkëpunimi mes Kosovës dhe Sllovenisë është modeli më i mirë i bashkëpunimit të suksesshëm të vendeve të rajonit.

Kryeministri i Kosovës ka theksuar rëndësinë e mbështetjes sllovene për qeverinë kosovare lidhur me procesin e integrimeve evropiane, e posaçërisht për procesin e liberalizimit të vizave për qytetarët e Kosovës. Në këtë drejtim, ai mori mbështetjen e homologut të tij se Sllovenia do të vazhdojë të jetë mbështetëse e Kosovës për procesin e liberalizimit të vizave.

Nga ana te tij, kryeministri i Sllovenisë, Borut Pahor, vlerësoi lartë bashkëpunimin mes qeverive të dy vendeve dhe shprehu bindjen se ky proces i bashkëpunimit do të avancohet në të gjitha fushat, me theks të veçantë në fushën e zhvillimit ekonomik. Ai theksoi se perspektiva e Kosovës është e qartë, ajo është perspektiva evropiane dhe në këtë proces të rëndësishëm Sllovenia do të jetë mbështetësja e Kosovës. /Telegrafi/