Demarkacioni me Malin e Zi deri në fund të vitit

Zëvendëskryeministri dhe ministri i Drejtësisë, Hajredin Kuçi, qëndroi
për vizitë zyrtare në Mal të Zi, ku në Podgoricë u prit nga
zëvendëskryeministri dhe ministri i Drejtësisë i Malit të Zi, Dushko
Markoviq. Në këtë takim u bisedua për mundësin e finalizimit të
marrëveshjeve për bashkëpunim juridik ndërkombëtar në çështje penale, ku
të dy zëvendëskryeministrat u pajtuan që deri në fund të këtij viti,
Kosova dhe Mali i Zi, t'i nënshkruajnë tri marrëveshje: marrëveshjen për
ekstradim, transferim të personave të dënuar dhe bashkëpunim gjyqësor
në çështje penale. Po ashtu u bisedua edhe për demarkacionin e kufirit
Kosovë - Mali i Zi dhe u tha se demarkacioni do të përfundojë deri në
fund të vitit. Temë tjetër e këtij takimi ishte rregullimi i çështjes së
pakicës malazeze në Kosovë, ku zëvendëskryeministri Kuçi e sigurojë
homologun e tij, Markoviç, se pakica malazeze do të ketë trajtim të
njëjtë si të gjithë shtetasit e tjerë të Kosovës. Zëvendëskryeministri
Kuçi u takua edhe me kryetaren e Gjykatës Supreme të Malit të Zi, Vesna
Medenica. Në këtë takim morën pjesë edhe kryetari i Këshillit
Prokurorial, njëherësh kryeprokuror i Kosovës, Ismet Kabashi, kryetari i
Këshillit Gjyqësor të Kosovës, Enver Peci dhe kryetari i Gjykatës
Supreme të Kosovës, Fejzullah Hasani.