Juppe: Franca mbetet zë i fuqishëm i Kosovës

Republika e Francës do të mbështes fuqishëm forcimin e
subjektivitetit ndërkombëtar të shtetit të Kosovës dhe do të jetë një zë
i fuqishëm i Republikës së Kosovës, në rrugën e saj integruese në
Bashkimin Evropian. Këtë qëndrim të shtetit francez e ka rikonfirmuar
Ministri i Punëve të Jashtme dhe Evropiane i Republikës së Francës ,
Alain Juppé, gjatë takimit që ka zhvilluar në Paris me Ministrin e
Punëve të Jashtme të Republikës së Kosovës, Enver Hoxhaj.Ministri
Juppé siguroi ministrin Hoxhaj se Franca edhe më tutje do të mbështes
dhe promovojë fuqishëm pavarësinë e Kosovës në botë. “Ne edhe më herët
kemi mbështetur Kosovën për sigurimin e njohjeve dhe këtë do të bëjmë
edhe në të ardhmen”, ka theksuar Juppé. Në takim, po ashtu, është
biseduar edhe për kultivimin e marrëdhënieve strategjike mes Francës dhe
Republikës së Kosovës, si dhe mundësinë e investimeve të kompanive
franceze në Kosovë.
Nga ana e tij, ministri Hoxhaj, ka falënderuar ministrin francez
Juppé për ndihmën që shteti i tij i ka dhënë Kosovës, para dhe pas
pavarësisë. Ai ka kërkuar ndihmën e Francës për procesin e liberalizimit
të vizave, të Integrimeve Evropiane, për lidhjen e marrëdhënieve
kontraktuale me BE-në si dhe për përmbylljen e procesit të njohjeve. Me
këtë rast, Ministri Juppé ka siguruar ministrin Hoxhaj se Franca do të
jetë një zë i fuqishëm i Kosovës në rrugën e saj për në Bashkimin
Evropian.
Gjatë qëndrimit në Paris, ministri Hoxhaj do të takojë edhe
ambasadorë të shteteve të huaja të akredituar në Republikën e Francës.
Ndërsa, të mërkurën, Ministri i Punëve të Jashtme i Kosovës do të marrë
pjesë në një takim të Komisionit për Punë të Jashtme të Asamblesë
Nacionale të Francës. /Telegrafi/