Brukselit i është ngutur me dialogun Prishtinë-Beograd

Kryetari i Kuvendit, Jakup Krasniqi tha të mërkurën se jo vetëm
veriu, por edhe pjesa tjetër e vendit ka nevojë për më shumë rend dhe
ligj.Sipas tij, serbët e veriut do ta kuptojnë se duhet të
integrohen në institucionet dhe shtetin e Kosovës, por për këtë
nevojitet kohë.
Krasniqi i bëri këto komente gjatë një bashkëbisedimi me studentët e
Kolegjit Universitar “Pjetër Budi”. Ai tha, po ashtu, tha se veriu është
çështje e brendshme e Kosovës dhe assesi nuk mund të zgjidhet në
bisedime me Serbinë.
Duke folur për grevën e veteranëve të luftës, Krasniqi tha se ligji
për vlerat e luftës ende nuk ka mbërritur nga Qeveria në Kuvend dhe se
kërkesat e grevistëve janë të drejtuara kah ekzekutivi.
Ndërkaq, duke u përgjigjur në një pyetje se çka përfiton e çka humb
Kosova nga dialogu me Serbinë, kryeparlamentari u shpreh se për këtë
dialog nuk kanë qenë të përgatitur as Prishtina, e as Beogradi, por se
Brukselit i është ngutur.
I pyetur nga studentët se si e vlerëson punën e EULEX-it, Krasniqi ka
potencuar se, sikurse institucionet e Kosovës, edhe EULEX-i ka traditë
të shkurtër të funksionimit dhe, së këndejmi, i ka dobësitë e veta.
“Por, unë jam më se i gatshëm që t`i adresoj përgjegjësitë tek
institucionet e Kosovës. Megjithatë, funksionimi i EULEX-it nuk mund të
bëhet pa komunikim më përmbajtësor mes tij dhe institucioneve kosovare”,
ka theksuar Krasniqi.
Ai ka folur edhe rreth marrëdhënieve të Kosovës me Fondin Monetar
Ndërkombëtar (FMN), duke thënë se para disa ditësh, kur e ka takuar
drejtorin e FMN-së, nuk është përmendur ndërprerjen e marrëdhënieve, e
as ndryshimi i statusit të marrëveshjes.
Me rastin e vizitës në Kolegjin Universitar “Pjetër Budi”, Krasniqit
iu nda Medaljoni i Artë i këtij institucioni, me motivacionin “për
kontribut në luftë dhe paqe”. /Telegrafi/