Përgatiten dy dokumente jetike për Prishtinën

Komuna e Prishtinës deri më tani ka përgatitur planet rregulluese për vetëm rreth 50 për qind të territorit.Drejtoresha
e urbanizimit Luljeta Sokoli thotë se aktualisht janë duke punuar në dy
dokumente jetike për kryeqytetin: planin urbanistik dhe atë zhvillimor.
Ndërsa, arkitektët vlerësojnë se planet rregullative në Prishtinë nuk
korrespondojnë me zbatimin e tyre në praktikë.
Komuna e Prishtinës është duke punuar në hartimin e dy dokumenteve
jetike për kryeqytetin: planin urbanistik dhe atë zhvillimor, raportoi
Radio Kosova.
Drejtoresha Sokoli thotë se këto dokumente janë shumë të rëndësishme
për qytetin e Prishtinës. Sipas saj, studimi i trafikut, ekonomisë dhe
mjedisit, janë tri shtylla kryesore në të cilat do të bazohen këto
dokumente.
Ajo tha se këto dokumente i japin një vizion të qëndrueshëm
kryeqytetit. Sipas saj, deri më tani rreth 50 për qind e sipërfaqes së
Prishtinës, janë të mbuluara me planet rregulluese.
Ndërsa, asociacioni i komunave të Kosovës thotë se duhet të jepen ide të reja për planet rregullative për Prishtinë.
Komuna e Prishtinës deri tani ka diskutuar për planin rregullues
“Vellusha”, qytezën “Pejton”, lagjen Çamëria-Medrese, për zonën
ekonomike, ndërkohë që po përgatiten planet për “Prishtinën e Re”, dhe
zonat qendër, lindje dhe perëndim. /Telegrafi/