Çitaku viziton komunat, diskuton procesin e riintegrimit

Ministrja e Integrimit Evropian, Vlora Çitaku ka vazhduar me
takimet e radhës në kuadër të vizitave të parapara me të gjitha komunat e
Republikës së Kosovës. Takimet kanë për qëllim koordinimin dhe
komunikimin ndërmjet nivelit qendror dhe lokal në procesin e
ri-integrimit të personave të riatdhesuar. Çitaku ka vizituar komunën e Shtimes, Fushë Kosovën dhe komunën e Obiliqit.
Gjatë këtyre vizitave Ministrja Çitaku është informuar më në detaje
rreth gjendjes aktuale të procesit të riatdhesimit nëpër këto komuna si
dhe janë diskutuar modalitetet për një ri-integrim sa më të suksesshëm
të qytetarëve të riatdhesuar.
Ministrja Çitaku është zotuar se personalisht do të përkujdeset që
komunat të kenë mbështetjen maksimale nga Qeveria e Republikës së
Kosovës rreth përmbushjes së detyrimeve që burojnë nga procesi i
liberalizimit të vizave.
Të pranishëm në takime nga përfaqësuesit e komunave ishin edhe
zyrtarë për integrim evropian dhe zyrtarë për kthim dhe komunitete.
/Telegrafi/