Komunat e reja funksionojnë me sukses?

Fokusi dhe vëmendja kryesore e punës gjatë muajve në vijim do të jetë mbështetja e aktiviteteve të Ekipit Përgatitor Komunal në Mitrovicën e Veriut, me qëllim që të përmbyllet me sukses edhe krijimi i komunës së re, theksoi ministri i Administrimit të Pushteti Lokal, Slobodan Petrovic.

Ministri këto komente i bëri në konferencën e organizuar nga Instituti për Qeverisje Lokale me temë “Decentralizimi, një barrë e rëndë për ta realizuar”.

“Progresi i arritur nga ajo kohë deri tani përfshin objektivat e reformimit të legjislacionit nga fusha e pushtetit lokal, themelimit të komunave të reja, ngritjes së kapaciteteve të komunave në koordinim me donatorët, dhe informimin e qytetarëve në lidhje me procesin e decentralizimit”, tha ai.

Sipas tij, tashmë funksionojnë me sukses si komuna në vete: Graçanica, Kllokot/Vërboci, Ranillugu e Parteshi, ndërkohë që ka kaluar pa asnjë problem zgjerimi i Komunës së Novobërdës me 14 zona kadastrale shtesë.

“Kur flasim për procesin e decentralizmit, gjithmonë duhet të kuptojmë se ky proces i realizuar mbi dy parime themelore: krijim i komunave të reja me shumicë serbe dhe ofrim i shërbimeve më afër qytetarit”, tha ministri, duke shtuar se megjithatë, qëllimi është që të rritet ndërgjegjësimi për rëndësinë e standardeve evropiane që janë të gërshetuara përmes procesit të decentralizimit.

Ndërsa, shefi i Zyrës Ndërkombëtare Civile në Kosovë, Peter Feith tha se duhet më tepër përkushtim për të themeluar komunën e Mitrovicës së Veriut.

Duke folur për punën e Ekipit përgatitor për komunën e re, Feith tha se decentralizimi nuk është i lehtë për t’u kryer, e as nuk është perfekt, ndërkaq shtoi se zyra e tij do të ndihmojë qeverinë në bërjen e komunës së re.

Ndërkaq, Besnik Tahiri nga Instituti kosovar për qeverisje lokale, tha se decentralizimi nuk do të quhet i suksesshëm nëse nuk themelohet komuna në veri të Mitrovicës, e cila sipas tij, do të mundësonte që atje të shtrihej autoriteti i shtetit të Kosovës.
/Telegrafi/