Gentilini: Shtyrja e takimit për t’iu dhënë kohë palëve

Përfaqësuesi Special i Bashkimit Evropian në Kosove, Fernando
Gentilinit ka thënë të premten se shtyrja e takimit të radhës ndërmjet
delegacionit të Kosovës dhe Serbisë është bërë për t’iu dhënë më shumë
kohë palëve për përgatitjet e brendshme, me qëllim që të arrihen
marrëveshje konkrete në takimin e ardhshëm.Përfaqësuesi
special i BE-së në një prononcim për Telegrafin ka thënë se në
përgjithësi procesi ka qenë pozitiv dhe të dy ekipet kanë punuar në një
frymë konstruktive.
“Është vendosur të shtyhet takimi i radhës i dialogut, i cili ishte
planifikuar për javën e ardhshme deri në fund të qershorit. Kjo është
bërë për t’ju dhënë më shumë kohë palëve për përgatitjet e brendshme dhe
për diskutimet teknike të nivelit të ultë me qëllim që të arrihen
marrëveshje konkrete në takimin e ardhshëm”, ka thënë Gentilini.
Më tej, përfaqësuesi i BE-së është shprehur “Unë kam respekt për të
dy palët. E kam ndjekur dialogun që nga fillimi dhe e di se nuk është e
lehtë. Është bërë shumë progres deri më tash dhe si rezultat i kësaj,
marrëveshjet në ato çështje që janë mbi tavolinë janë gati për t’u
arritur... Në përgjithësi procesi ka qenë pozitiv dhe të dy ekipet kanë
punuar në një frymë konstruktive. Por, bisedimet janë si një garë,
metrat e fundit janë gjithmonë më të vështirat. Unë jam i sigurt se me
më shumë përpjekje, dy palët do t’ia arrijnë”. /Telegrafi/