S’ka vendim për rastin “Kleçka”

Të hënën nuk është kumtuar asnjë vendim i Gjykatës së Qarkut në
Prishtinë lidhur me rastin “Kleçka”. Pavarësisht se gazetarët kanë
pritur me orë të tëra para dyerve të gjykatës, asnjë vendim nuk është
publikuar.Sipas avokatëve mbrojtës, pritet që vendimi në
lidhje me tetë të akuzuarit, që janë sjellë në gjykatore të hënën, të
bëhet i ditur pas dy ditësh.
Ndryshe, seanca ka filluar nën masa të shumta policore, ku njëri prej
të akuzuarve është edhe deputeti i Kuvendit të Kosovës dhe ish-ministri
i Transportit dhe Post-Telekomunikacionit, Fatmir Limaj.
Tetë të akuzuarit ishin sjellë në gjykatore me vetura të policisë,
ndërkohë që prokurori i EULEX-it, Maurizzio Sallustro i ngarkon ata me
veprën penale për krime të luftës lidhur me vitin 1999.
Kjo seancë u mbajt me dyer të mbyllura, ndërsa pritet që tetë të
akuzuarve, gjyqtari i procedurës paraprake t’ia vazhdojë masën e
paraburgimit.
Para tre muajve, të gjithë ata ishin në paraburgim në afat prej 30
ditësh, ndërkohë që pas rishqyrtimit, pesë prej tyre iu vazhdua kjo masë
kurse tre të tjerët u quan në arrest shtëpiak. I vetmi që nuk është
arrestuar është nënkryetari i PDK-së, Fatmir Limaj, i cili gëzon
imunitet si deputet i Kuvendit. /Telegrafi/