Seancë komemorative për ish ministren Kelmendi

Kryesia e Kuvendit të Kosovës ka vendosur që ta shtyjë
interpelancën ndaj kryeministrit Hashim Thaçi për javën e ardhshme. Kjo
për faktin se Kuvendi i Kosovës do të organizoi një seancë komemorative
për nder të deputetes dhe ish ministres, Nekibe Kelmendi. Kryetari
i Kuvendit të Kosovës, Jakup Krasniqi njoftoi se seanca komemorative
fillon prej orës 13:30- 14:00, ndërkohë rreth orës 14:00 në hollin e
Kuvendit të Kosovës do të vendoset trupi i pajetë i deputetes Kelmendi,
ku do të bëhen homazhe pranë trupit të saj.
Ndërkaq, varrimi do të bëhet në orën 17:00, në varrezat e Prishtinës.
Pas një sëmundje të rëndë në disa muaj të fundit, të dielën ka vdekur deputetja në Kuvendin e Kosovës, Nekibe Kelmendi.
Në qeverinë e kaluar të Kosovës, Kelmendi ishte ministre e Drejtësisë, si dhe ka kryer funksione të larta partiake në LDK.
Në vitin 1999, ditën e parë pas fillimit të bombardimeve, forcat
okupuese serbe ia vranë bashkëshortin, avokatin e njohur dhe aktivistin e
të drejtave të njeriut, Bajram Kelmendi dhe dy djemtë e saj, Kushtrim e
Kastriot Kelmendi. /Telegrafi/