VV: Për interpelancë duhet të vendos Kuvendi, jo Thaçi

Pas marrjes së lajmit se deputetja e Kuvendit të Kosovës, Nekibe
Kelmendi, ndërroi jetë, me kërkesë të Lëvizjes Vetëvendosje është
shtyrë interpelanca e paraparë për sot lidhur me autostradën
Morinë-Merdarë, mirëpo sipas kësaj lëvizje për kohën e interpelancës
duhet të vendos Kuvendi dhe jo kryeministri Hashim Thaçi. “Lëvizja
Vetëvendosje kërkoi që interpelanca të shtyhet për një ditë, pra për të
martën, ose për seancën e ardhshme plenare, pra të enjten. Por Qeveria e
Kosovës ishte ajo që, sipas avazit të vjetër, doli me makinacionet e
saj me qëllim të ikjes nga interpelanca. Fillimisht kryeministri Thaçi
paralajmëroi se është i gatshëm të ishte i pranishëm në interpelancë
vetëm dhe vetëm të mërkurën, pra pikërisht në ditën kur është caktuar të
mbahet protesta e 22 qershorit e paralajmëruar një javë më herët”,
thuhet në komunikatën e Vetëvendosjes.
Sipas Vetëvendosjes, kjo do të thotë që Thaçi jo vetëm që po i ikë përgjegjësisë, por ai po do edhe ta pengojë demonstratën.
“Vetëvendosje qe e gatshme për interpelancë në secilën ditë, përveç
të mërkurës, për shkak të protestës të caktuar tashmë. Kurse Qeveria nuk
ishte e gatshme për asnjë ditë tjetër përveç të mërkurës. Kjo tregon
qartë se Thaçi jo vetëm që nuk e ka mendjen te llogaridhënia, por madje
ambiciet e tij për pushtet kalojnë edhe nëpërmjet mohimit të lirisë së
protestës”, thuhet në komunikatë.
Më tej Vetëvendosje thekson se Kuvendi i Republikës së Kosovës në
përgjithësi duhet të jetë më vigjilent dhe të mos e pranojë praktikën që
Qeveria ta përcaktojë interpelancën, që sipas Vetëvendosjes është
dashur të mbahet qysh javën e kaluar. /Telegrafi/