SHBA e sheh FSK-në në strukturat euroatlantike

Zëvendës/ambasadorin amerikan në Prishtinë, Michael Murphy, ka
deklaruar të martën se Shtetet e Bashkuara dëshirojnë që në të ardhmen
ta shohin Forcën e Sigurisë së Kosovës (FSK) të integruar në
institucionet rajonale dhe euroatlantike. Ai ka thënë se është i bindur
se FSK-ja në kuadër të mandatit të saj, do të vazhdon zhvillimin e saj
edhe më të mirë që do të ofrojë siguri për gjithë popullin e Kosovës.Zëvendës/ambasadorin
amerikan i bëri këto komente me rastin e nënshkrimit të memorandumit të
bashkëpunimit në mes Ministrisë së FSK-së dhe Ambasadës së Shteteve të
Bashkuara të Amerikës në Prishtinë, për pranimin e një donacioni në
vlerë prej 2.5 milionë dollarëve, i dhuruar përmes “Fondit të
Mirëbesimit” në Bruksel për FSK-në. Donacioni ka të bëj me sistemin e
menaxhmentit informativ.
“Ne jemi të lumtur që po hapim këtë fushë të re të bashkëpunimit,
fushë kjo e cila i ofron FSK-së mjetet që i duhen për të ndihmuar
vetveten. Është e rëndësishme që të kuptohet se ky donacion, nuk është
një dhuratë, ky është një obligim për ne në ngritjen e FSK-së”.
“Unë e di se FSK do t’i tregojë komunitetit ndërkombëtar, se ajo
është, një partner i besuar dhe plotësisht e aftë për të përmbushur
detyrat e përcaktuara me ligjin e Kosovës. Ne jemi shumë të kënaqur që
edhe ne kemi kontribuar në përparimin që FSK ka bërë deri tani, dhe
besojmë se ky donacion do të kontribuojë shumë në zhvillimin e FSK-së
edhe në të ardhmen”, tha ndër të tjera Murphy.
Duke folur për rëndësinë e këtij donacioni, ministri i FSK-së, Agim
Çeku u shpreh se një marrëveshje e tillë dëshmon se FSK-ja ka miq të
cilët ndihmojnë që rruga drejt modernizimit të jetë e nivelit sa më të
lartë. Ai tha se kjo marrëveshje përshtatet edhe me synimin e Kosovës që
FSK-ja të jetë forcë moderne edhe në aspektin e teknologjisë
informative. /Telegrafi/