Veriu po “rrëshqet nga dora”

Institucionet në Prishtinë pavarësisht planeve dhe strategjive të ndryshme të hartuara për çdo vit, kanë dështuar të integrojnë pjesës veriore në jetën institucionale të vendit. Status-quo-ja në pjesën përtej lumit Ibër vazhdon, derisa Beogradi zyrtar nëpërmjet strukturave paralele vazhdon ta mbajë nën kontroll atë pjesë të territorit të Kosovës.

Forcat politike opozitare, por edhe analistë kosovarë fajëson Qeverinë e Kosovës për situatën në veri, duke thënë se mungesa e vullnetit politik ka ndikuar që ky rajon të “rrëshqasë nga dora” e shtetit.

Ish-ministri i Administratës Lokale, Sadri Ferati, deputet i LDK-së, pranon se Beogradi është i pranishëm në veri përmes strukturave ilegale, të cilat rrezikojnë çfarëdo zgjidhjeje për veriun, shkruan Zëri.

Si problem në vete, ai përmend sundimin e rendit dhe ligjit, derisa kundërshton shmangien nga Pakoja e Ahtisaarit.

“Dihet se atje funksionojnë struktura ilegale serbe që rrezikojnë çdo iniciativë të institucioneve kosovare. Andaj, ka qenë e pritshme që bashkësia ndërkombëtare të bëjë trysni më të madhe në raport me Beogradin, në mënyrë që në atë pjesë gjërat të lëvizin”, ka thënë Ferati, i cili beson se gradualisht gjërat do të lëvizin në drejtim pozitiv, ku dora e autoriteteve shtetërore të Kosovës do të fillojë të ndjehet.

Ndërkaq, Glauk Konjufca i Vetëvendosjes thotë se asnjëra nga qeveritë nuk ka pasur vullnet që të shtrijë autoritetet në atë pjesë. /Telegrafi/