AKI “out” nga veriu

Agjencia Kosovare e Inteligjencës (AKI), si një nga mekanizmat kryesorë të sigurisë së shtetit të Kosovës, kishte dështuar më 25 korrik, ditën kur Policia Speciale e Kosovës ndërmori aksionin për rikthimin e pikave doganore 1 dhe 31 nën autoritetin e Prishtinës zyrtare.
Agjencia, e cila do të duhej të ishte prijëse dhe përcaktuese për një aksion të suksesshëm të policisë, dështoi për faktin se nuk e kishte asnjë informatë të vetme për gjendjen në pjesën veriore të vendit, shkruan gazeta Zëri.

Se AKI-ja ka dështuar këtë e pranojnë edhe zyrtarë të lartë të Ministrisë së Punëve të Brendshme, nën urdhrat e së cilës ministri është organizuar aksioni i 25 korrikut.

Madje thuhet se sikur AKI-ja të ishte më produktive në rastin e fundit, atë të intervenimit në veri të vendit, Njësia Speciale e Policisë së Kosovës nuk do të ndalej fare nga barrikadat serbe, por do ta zbatonte një plan tjetër, i cili do të mundësonte që të arrihej në cakun e synuar – pika doganore e Jarinës.

Zëvendësministri i Punëve të Brendshme, Ismet Ibishi, duke iu referuar rastit të intervenimit në veri dhe hasjen në pengesa dhe barrikada të ndryshme, thotë se AKI-ja nuk ka pasur informata të hollësishme se çfarë po ndodh në këtë zonë të vendit ./Telegrafi