Policia intervistoi pesë serbë në Gazimestan

Policia e Kosovës ka regjistruar rreth 1.500 pjesëmarrës -
pelegrinë, të cilët në mënyrë të organizuar kanë marrë pjesë në
Graçanicë dhe Gazimestan të rajonit të Prishtinës me rastin e festës me
karakter religjioz “Vidovdani”, thuhet në një komunikatë të policisë së
Kosovës.“Policia e Kosovës me vigjilencë dhe profesionalizëm
maksimal ka ofruar shërbimin e vet të sigurimit të pelegrinëve dhe
qytetarëve në përgjithësi, duke siguruar një qarkullim të lirë sipas
agjendave dhe planeve te parapara”, thuhet në komunikatë.
“Në një rast policia ka ndaluar dhe shoqëruar pesë persona për
intervistim, si dhe ka konfiskuar automjetin e tyre pasi që të njëjtit
pas përfundimit të pjesëmarrjes në manifestim, gjate rrugës në kthim e
sipër kanë sulmuar me gurë zyrtarët policor.
Provokimet dhe incidentet e ndodhura nuk kanë ndikuar në aspektin e sigurisë”, thuhet në komunikatë.
Me mesazhe politike për Kosovën si tokë të shenjtë serbe, nën
drejtimin e Kishës Ortodokse dhe disa udhëheqësve lokalë, mbi 1 mijë
pjesëtarë të komunitetit serb kanë shënuar 622-vjetorin e Betejës së
Kosovës. Shënimi i kësaj date ka filluar me një liturgji në Manastirin e
Graçanicës dhe më pas ka vazhduar me një tubim në Gazimestan në
periferi të Prishtinës.
Në vitin 1389, forcat ballkanike (jo vetëm serbe) humben betejën ndaj
ushtrisë së Perandorisë Otomane, por kjo betejë vazhdimisht është
politizuar nga shteti serb, për të dëshmuar gjoja praninë e saj të
hershme në Kosovë. /Telegrafi/