Çitaku: Komunat te shfrytëzojnë fondin e riatdhesimit

Ministrja e Integrimit, Vlora Çitaku të mërkurën në Mitrovicë tha se ri-integrimi të riatdhesuarve është një prej kritereve kryesore lidhur me liberalizimin e vizave për Kosovën dhe për këtë të gjithë duhet të jenë të angazhuar.

Në takimin me kryetarin e komunës së Mitrovicës, Avni Kastrati, ministrja e Integrimit tha se deri tani komunat nuk kanë aplikuar shumë për të përfituar nga fondi prej 3.5 milionë eurosh, të ndarë nga qeveria për ri-integrimin e të riatdhesuarve.

“Ky fond duhet të shfrytëzohet prej komunave për të riatdhesuarit. Janë mjete të ndara për ushqim, strehim, barna, por edhe nisjen e ndonjë biznesi të vogël nga të riatdhesuarit”, tha ajo.

Kryetari i komunës, Avni Kastrati falënderoi qeverinë franceze për dhurimin e kampit “Belvedere” në Frashër, me çka është krijuar mundësi për pritjen dhe strehimin e të riatdhesuarve”.

Ai tha se në atë kamp që do të menaxhohet nga Komuna dhe Ministria e Punëve të Brendshme (MPB), janë rreth 800 kontejnerë për strehim, mandej ekziston kuzhina etj.

Ndërsa, drejtori për Integrime Evropiane dhe Mirëqenie Sociale, Kastriot Jashari, tha se në Mitrovicë në vitin e kaluar janë riatdhesuar 40 familje, ndërsa në gjashtë muajt e parë të këtij viti 116 familje. “Prej këtyre 116 familjeve të riatdhesuara për 19 prej tyre kemi të dhëna në detaje për numrin e anëtarëve të familjes, pronës së tyre, kushteve etj. Të tjerët i kemi kontaktuar dhe i kemi njoftuar për mundësitë që ju ofrohen dhe që duhet t’i shfrytëzojnë”, tha ai.

Ndërkaq, përfaqësuesi i BE-së në Kosovë, Fernando Gentilini dhe ambasadori francez, Jean Fransua Fitou, kanë potencuar rëndësinë e ri-integrimit të të riatdhesuarve. Ata kanë vënë në pah domosdoshmërinë e koordinimit të veprimeve ndërmjet pushtetit lokal dhe atij qendror, por edhe faktorëve ndërkombëtarë që ndihmojnë në këtë drejtim. /Telegrafi/