VV: Thaçi u iku përgjigjeve

Grupi parlamentar i Lëvizjes Vetëvendosje, në konferencë të jashtëzakonshme për media, i tërhoqi vërejtjen opinionit publik se gjatë interpelancës së sotme në Kuvendin e Kosovës, Qeveria dhe kryeministri Hashim Thaçi përdori makinacionet e veta për t’i ikur përgjigjeve dhe për ta devijuar temën, për të cilën ishte thirrur interpelanca.

Shefi i Grupit Parlamentar i Lëvizjes Vetëvendosje, Visar Ymeri, theksoi se rreth 56 minuta u përdorën për të diskutuar tema të tjera, në vend se të flitej për kontratën në mes të Qeverisë dhe konsorciumit Bechtel – Enka, temë kjo për të cilën ishte thirrur interpelanca.

”Hashim Thaçi inskenoi një debat me deputetë të Lidhjes Demokratike të Kosovës se a e qeveris ky Kosovën më mirë, apo Isa Mustafa Prishtinën më mirë” shtoi në vazhdim Ymeri. ”Ky ishte uzurpim i kohës së Kuvendit me qëllim të devijimit të temës”, tha Ymeri.

Gjithashtu ai vuri në theks se në interpelancën e sotme koha të cilën e shfrytëzoi pozita ishte shumë më e madhe sesa lejohet me rregulloren e Kuvendit. ”Pozitës i ishte lejuar të flasë 90 minuta nga Kryetari i Kuvendit i Kosovës, përfshirë këtu edhe 15 minuta të kryeministrit, mirëpo ne të gjithë jemi dëshmitarë se ata folën shumë më gjatë, pra u shkel neni 44 i rregullores së punës së Kuvendit të Kosovës, me të cilin edhe koha e pozitës është e kufizuar, në bazë të numrit të deputetëve”, tha në fund Ymeri.

Ndërkaq Glauk Konjufca tha se ky Kuvend është degraduar në paradë të Hashim Thaçit, i cili e keqpërdor Kuvendin e Kosovës për të shmangur temat të cilat duhet diskutuar në të, pra nënshkrimit të një kontrate, sipas tij, tërësisht të pafavorshme për qytetarët e Kosovës, për të cilën ne kishim thirrë në interpelancë. /Telegrafi/